سینئرسپرنٹنڈنٹ پولیس راجہ عرفان سلیم نے زلزلہ متاثرہ علاقوں میں جاری ریسکیو، ریلیف کی سرگرمیوں بارے بریفنگ دی
میرپور(ایچ ایم نیوز)آزادکشمیر پولیس کے سربراہ انسپکٹرجنرل صلاح الدین زلزلہ متاثرہ علاقوں میں امن وامان اور سکیورٹی کی صورتحال کاجائزہ لینے میرپورپہنچ گئے۔سینئرسپرنٹنڈنٹ پولیس راجہ عرفان سلیم نے انھیں زلزلہ متاثرہ علاقوں میں جاری ریسکیو، ریلیف کی سرگرمیوں کے بارے میں میرپورپولیس کے کردار سے متعلق بریفنگ دی۔ انھوں نے آئی جی پولیس کوبتایا کہ زلزلہ متاثرہ علاقوں میں پولیس پوری طرح چوکس ہے۔ مختلف مقامات پر پولیس چوکیاں قائم کی گئی ہیں جونہ صرف زلزلہ متاثرین کوریسکیوکررہی ہیں بلکہ ریلیف کے ساتھ ساتھ سکیورٹی کے فرائض بھی سرانجام دے رہی ہے۔ انھوں نے کہاکہ الحمدوللہ اس وقت تک زلزلہ متاثرہ علاقوں سے کسی قسم کی چوری چکاری یادیگرجرائم کی کوئی شکایت موصول نہیں ہوئی ہے۔ انسپکٹرجنرل پولیس صلاح الدین نے ضلعی پولیس کی کارکردگی کوسراہا۔ انھوں نے پولیس افسران کوہدایت کی کہ وہ مصیبت کی اس گھڑی میں پوری دلچسپی کے ساتھ متاثرین زلزلہ کی دیکھ بھال کریں۔ اس وقت بڑی تعداد میں امدادی کارکن اورتنظیمیں زلزلہ متاثرہ علاقوں میںآرہی ہیں اس لیے وہ پوری طرح چوکس رہیں اورحالات پرگہری نظررکھیں۔ انھوں نے زلزلہ اور اس کے بعد کے ایام میں پولیس فورس کی طرف سے بروقت اوربھرپورکارکردگی کی تعریف کی۔
