ہم معاملے کی تحقیقات کے لیے ملٹری پولیس انکوائری کا آغاز کر رہے ہیں،وزارت دفاع
ہسپانوی حکام سے تعاون کریں اور اگر افسر قصوروار ثابت ہو تو انہیں قانون کے مطابق سزا دی جائے، برازیلین صدر
برازیلیا(ایچ ایم نیوز)برازیل کے صدر جیئر بولسونارو کے ساتھ جاپان میں 'جی 20' اجلاس کے لیے سفر کرنے والے برازیلین فضائیہ کے افسر سے اسپین کے ایئرپورٹ پر 39 کلوگرام کوکین برآمد کی گئی۔امریکی نشریاتی ادارے 'سی این این' کی رپورٹ کے مطابق اسپین کے سی ویلے ایئرپورٹ پر برازیلین فضائیہ کے افسر سے اتنی بڑی مقدار میں کوکین برآمد ہونے کے بعد انہیں گرفتار کر لیا گیا۔برازیلین وزارت دفاع سے جاری بیان میں کہا گیا کہ افسر کو ایئرپورٹ پر اس وقت گرفتار کیا گیا جب 'جی 20' اجلاس میں شرکت کے لیے اوساکا جانے والے برازیل کے صدر کے بیک اپ طیارے نے اسپین میں اسٹاپ اوور کیا۔بیان میں کہا گیا کہ 'وزارت دفاع کو بتایا گیا کہ منشیات کے ساتھ سفر کرنے والے مشتبہ افسر کو 25 جون کو اسپین کے سی ویلے ایئرپورٹ پر حراست میں لیا گیا۔برازیلین وزارت دفاع نے کہا کہ 'ہم معاملے کی تحقیقات کے لیے ملٹری پولیس انکوائری کا آغاز کر رہے ہیں۔'سی این این سے منسلک ریکارڈ ٹی وی کی رپورٹ میں بتایا گیا کہ افسر کی شناخت 38 سالہ سارجنٹ سِلوا روڈریگس کے نام سے ہوئی۔واقعے کے وقت الگ طیارے میں سفر کرنے والے برازیل کے صدر جیئر بولسونارو نے افسر کی گرفتاری پر ردعمل دیتے ہوئے 'ٹویٹ' کرتے ہوئے کہا کہ انہوں نے وزارت دفاع سے کہا ہے کہ وہ ہسپانوی حکام سے تعاون کرے اور اگر افسر قصوروار ثابت ہو تو انہیں قانون کے مطابق سزا دی جائے۔
