قانون نافذ کرنے والے اداروں نے گڑھی شاہو میں بھی کارروائی کر کے چار مشتبہ افراد کو حراست میں لیا
خود کش بمبار اور مبینہ سہولت کاروں نے رات داروغہ والا میں بسر کی ، دھماکے سے پہلے دربار کے اندر جا کر بھی ریکی کی گئی‘ میڈیا رپورٹس
لاہور( ایچ ایم نیوز)داتا دربار کے باہرہونے والے خود کش دھماکے کی تحقیقات میں اہم پیشرفت ہوئی ہے اور قانون نافذ کرنے والے اداروں نے خود کش حملہ آور کے دو مبینہ سہولت کاروں کو گرفتار کر لیا ہے ،سی سی ٹی وی فوٹیجز کی چین ملا کر گڑھی شاہو سے بھی چار مشتبہ افراد کو حراست میں لیا گیا ہے، خود کش بمبار کو ریلوے اسٹیشن سے لانے والے موٹر سائیکل رکشہ ڈرائیور کو بھی حراست میں لیا گیا ۔ میڈیا رپورٹس کے مطابق حساس اداروں کی جانب سے داتا دربار کے باہر ہونے والے خود کش دھماکے کی تحقیقات میں سیف سٹی اتھارٹی اور نجی عمارتوں پرلگے ہوئے کیمروں پر انحصار کیا جارہا ہے اور فوٹیجز کی چین ملا کر گڑھی شاہو میں واقع ایک ٹی سٹال پر کارروائی کر کے چار مشتبہ افراد کو حراست میں لیا گیا ہے۔ بتایا گیا ہے کہ ٹی سٹال کے قریب واقعہ ایک رہائشگاہ پر بھی چھاپہ مارا گیا ہے جہاں پر ٹی سٹال کا مالک اور کام کرنے والے لڑکوں نے رہائش رکھی ہوئی تھی اور حساس اداروں نے ٹی سٹال اور رہائشگاہ کو سیل کر دیا ہے۔ مزید بتایا گیا ہے کہ سی سی ٹی وی فوٹیج کے مطابق خود کش بمبار کو گڑھی شاہو کے علاقے میں دیکھا گیا ہے اور وہاں سے ریلوے اسٹیشن پہنچا جہاں سے موٹر سائیکل رکشے پر سوار ہو کر بادامی باغ اورپھر مینا رپاکستان پہنچا۔ میڈیا رپورٹ کے مطابق خود کش حملہ آور وہاں سے پیدل داتا دربار کے قریب پرندہ مارکیٹ پہنچا جہاں پہلے سے دو لوگ موجود تھے۔ بتایا گیا ہے کہ خود کش حملے سے پہلے داتا دربار کی ریکی بھی کی گئی۔ پولیس نے موٹر سائیکل رکشے کا بھی سراغ لگا کر اسکے ڈرائیور کو حراست میں لیا اور اس سے تحقیقات میں کامیابی ملی ۔میڈیا رپورٹس کے مطابق قانون نافذ کرنے والے اداروںنے سی سی ٹی وی فوٹیجز سے سہولت کاروں کا بھی پتہ لگا لیا جنہیں داتا دربار سے ملحقہ ایک گلی میں معلومات کا تبادلہ کرتے ہوئے دیکھا گیا ۔ ان میں سے ایک نے دربار کے اندر جا کر ریکی بھی کی ۔ بتایا گیا ہے کہ خود کش بمبار اور مبینہ سہولت کاروں نے رات داروغہ والا میں بسر کی ۔ قانون نافذ کرنے والے اداروں نے مبینہ سہولت کاروں کو گرفتار کر کے انہیں مزید تحقیقات کے لئے نا معلوم مقام پر منتقل کر دیا ہے اور مزید گرفتاریو ں کا امکان ہے۔ میڈیا رپورٹ کے مطابق مبینہ سہولت کار دھماکے سے چند روز قبل پٹھان کالونی بادامی باغ میں بھی دیکھے گئے ۔علاوہ ازیں پولیس اورحساس اداروںنے بند روڈ، گڑھی شاہو، گرین ٹائون، پٹھان کالونی، ٹھوکر نیاز بیگ میں سرچ آپریشنز کئے اور کئی مشتبہ افراد کو حراست میں لیا گیا جنہیں بعد ازاں شناخت ظاہر ہونے پر چھوڑ دیا گیا ۔
