عدالت العالیہ کے ججز ،صدر بار ، سپریم کورٹ و ہائی کورٹ بار ایسوسی ایشن کے عہدیداران ، سینئر وکلائ‘ ملازمین اور سول سوسائٹی کی کثیر تعداد میں شرکت
مظفرآباد(ایچ ایم نیوز)وزیر اعظم اسلامی جمہوریہ پاکستان عمران خان کی کال پر مقبوضہ کشمیر کے عوام کے ساتھ اظہار یکجہتی کے لیے قائمقام چیف جسٹس آزاد جموں وکشمیر جسٹس راجہ سعید اکرم خان کی قیادت میں آزاد جموں وکشمیر سپریم کورٹ سے چھتر چوک تک احتجاجی ریلی نکالی گئی ۔ ریلی میں آزاد جموں وکشمیر عدالت العالیہ کے ججز جسٹس صداقت حسین راجہ ، جسٹس رضا علی خان ، جسٹس چوہدری منیر احمد ،صدر بار راجہ آفتاب خان ، آزاد جموں وکشمیر سپریم کورٹ و ہائی کورٹ بار ایسوسی ایشن کے عہدیداران ،آزاد کشمیر کے سینئر وکلاء، خواتین وکلاء، آزاد جموں وکشمیر سپریم کورٹ اور آزاد جموںوکشمیر ہائی کورٹ کے ملازمین اور سول سوسائٹی کی کثیر تعداد نے شرکت کی ۔ ریلی میں مودی حکومت کے 05اگست کے یکطرفہ اقدامات کے خلاف نعرے بازی کی گئی اور وکلاءنے کتبہ اور بینرز اٹھا رکھے تھے جن پر کشمیر یوں سے اظہار یکجہتی اور آزادی کے نعرے درج تھے ۔ ریلی چھتر چوک پہنچ کر اختتام پذیر ہوئی ۔ ریلی کے اختتام پر پاکستان اور آزاد جموں وکشمیر کے قومی ترانے بجائے گئے ۔
