کراچی کی منتخب بلدیاتی قیادت اپنے نوجوانوں کی ہرممکن مدد اور سرپرستی کررہی ہے،میئر
کراچی(ایچ ایم نیوز) میئر کراچی وسیم اختر نے کہا ہے کہ نوجوانوں کو ترقی کے مواقع دیئے بغیر ملک ترقی نہیں کرسکتا، کراچی کے نوجوان باصلاحیت ہیں اور ملک کی ترقی میں اپنا حصہ ڈالنا چاہتے ہیں مگر ہمارا نظام ایسا ہے کہ نوجوانوں کو آگے بڑھنے کے موقع کم ہی ملتے ہیں، کراچی کی منتخب بلدیاتی قیادت اپنے نوجوانوں کی ہرممکن مدد اور سرپرستی کررہی ہے، ان خیالات کا اظہار انہوں نے کراچی یوتھ فیڈریشن کے وفد سے بات چیت کرتے ہوئے کیا جس نے محمد عمرخان کی قیادت میں گزشتہ روز میئر کراچی سے ان کے دفتر میں ملاقات کی، یوتھ فیڈریشن کے وفد نے بتایا کہ ادارہ نوجوانوں کی صلاحیتوں کو نکھارنے اور ان کی فلاح وبہبود کے لئے قائم کیا گیا ہے اور نوجوان مختلف منصوبوں پر کام کررہے ہیں ،’’اپنا کراچی، سنواروں کراچی‘‘ منصوبے کے تحت نوجوانوں کو کراچی کو خوبصورت بنانے اور اس شہر کے مسائل حل کرنے کے لئے عملی اقدامات کی تربیت اور ذہن سازی کی جاتی ہے، میئر کراچی نے نوجوانوں کے اس اقدام کی تعریف کی اور کہا کہ بلدیہ عظمیٰ کراچی شہر کی سطح پر کراچی یوتھ فیڈریشن کی مثبت سرگرمیوں میں ہرممکن مدد اور تعاون کرے گی، یوتھ فیڈریشن کے زیراہتمام اسی ماہ کراچی یونیورسٹی میں منشیات کے خلاف ہونے والے سیمینار میں میئر کراچی شرکت کریں گے جبکہ دیگر سرگرمیوں میں بلدیہ عظمیٰ کراچی تعاون کرے گی تاکہ یوتھ فیڈریشن شہر کی ترقی اور خوبصورتی میں عملی اقدامات کے لئے نوجوانوں کو تیار اور متحرک کرسکے، انہوں نے کہا کہ بدقسمتی سے ایسے لوگ برسراقتدار ہیں جن کو شہر کی ترقی اور مسائل کے حل سے دلچسپی نہیں لہٰذا اب شہر کے لوگ خصوصاً نوجوانوں اور مخیر حضرات کو اس کی ترقی میں اپنا کردار ادا کرنا پڑے گا، ہم اتحاد اور اتفاق سے اس شہر کے مسائل حل کریں گے۔
