شہری علاقوں سے ہندوستانی فوج کو پیچھے ہٹا یا جائے‘ انسانی المیے سے بچاؤ کیلئے پاکستان کے عوام اور سماجی ادارے مقبوضہ کشمیر کے عوام کو ریلیف پہنچائیں
مسلم کانفرنس کے قائد اور سابق وزیراعظم سردار عتیق احمد خان کا سیمینار سے خطاب
لاہور(ایچ ایم نیوز)آل جموں وکشمیر مسلم کانفرنس کے قائد اور سابق وزیراعظم سردار عتیق احمد خان نے کہا ہے کہ عالمی برادری مقبوضہ جموں وکشمیر میں امن فوج کی تعیناتی کا راستہ ہموار کرے تاکہ شہری علاقوں سے ہندوستانی فوج کو پیچھے ہٹا کر حفاظتی انتظام سنبھالا جائے ، وہ گزشتہ روز یہاں انجمن ترقی پسندمصنفین کے زیر اہتمام کشمیریوں کا حق خود ارادیت ، علاقائی امن کی ضمانت کے موضوع سیمینار سے مہمان خصوصی کے طور پر خطاب کررہے تھے جبکہ سیمینار کی صدارت پیپلزپارٹی کے مرکزی رہنماءبیرسٹر اعتراز احسن نے کی ، سردار عتیق احمد خان نے کہا کہ اس وقت پاکستان کے عوام اور سماجی ادارے مقبوضہ کشمیر کے عوام کو ریلیف پہنچانا چاہیے تاکہ وہاں محاصرے کے اندر کوئی انسانی المیہ رونماءنہ ہو، یونیسف ، یونیسکو اور انٹر کمیٹی آف ریڈ کراس سمیت کسی بھی عالمی ادارے کے زیر اہتمام محصور علاقے میں ریلیف پہنچایا جانا ضروری ہے ، انہوں نے کہا کہ ہندوستان نے مرحلہ وار کشمیر پر قبضہ کرنے کی حکمت عملی اختیار کی ، حالیہ قدم اس جانب سب سے اہم اور فیصلہ کن پیش رفت ہے ، انہوں نے کہا کہ دنیا نے ہندوستان کا یہ موقف مسترد کر دیا ہے کہ کشمیر اس کا اندرونی مسئلہ ہے ، سلامتی کونسل میں مسئلہ کشمیر زیر بحث آنا اس بات کا ثبوت ہے کہ کشمیر ایک بین الاقوامی مسئلہ ہے اور کشمیر ی عوام کو حق خود ارادیت دینا لازمی ہے ، انہوں نے کہا کہ ہندوستان اس وقت شدید دباؤ میں ہے اور اس دباؤ کو بڑھانا چاہیے ہمیں مسئلہ کشمیر کو داخلی سیاست کی نذر کرنے سے ہرممکن حد تک گریز کرنا چاہیے انہوں نے کہا کہ کشمیری عوام پوری بہادری کے ساتھ بھارت کا مقابلہ کررہے ہیں آزاد کشمیر اور پاکستان کے عوام کو ان کی بھرپور مدد کرنا چاہیے ۔سیمینار میں آئی اے رحمان ، ڈاکٹر مبارک علی ، ڈاکٹر نسیم کاشمیری ، امتیاز عالم ، اسلم گورداسپوری ، ڈاکٹر سعادت سعید ، پروفیسر اسلم طارق ، ڈاکٹر عالم خان ، شعراءکرام اعجاز نقوی ، فرحت عباس شاہ ، جاوید قاسم ، افضل ساحر، مقصود خالق ، ڈاکٹر طاہر شبیر ، سرفراز انور صفی ، محترمہ طاہرہ سرا، زین عباس، مسلم کانفرنس کے رہنماءوحید الحق ہاشمی و دیگر نے شرکت کی ۔
