جنگی طیارے بھیجنے کا مقصد امریکی فوج اور مفادات کا تحفظ ہے،امریکی سینٹرل کمانڈ اینڈ کنٹرول
واشنگٹن(ایچ ایم نیوز) مشرق وسطی میں بڑھتی ہوئی کشیدگی کے پیش نظر امریکہ نے پہلی بار ایف 22 اسٹیلتھ طیارے قطر ائر بیس پر پہنچا دیے ہیں۔امریکی سینٹرل کمانڈ کی طرف سے جاری ایک بیان میں کہا گیا ہے کہ طیارے قطر کی العدید ایئربیس پر جمعرات کو پہنچے ہیں جن کا مقصد امریکی فوج اور مفادات کا تحفظ ہے۔سینٹرل کمانڈ نے ایف 22 اسٹیلتھ طیاروں کی صحیح تعداد نہیں بتائی لکن جو تصاویر میڈیا کو فراہم کی گئی ہیں ان میں پانچ طیارے نظر آرہے ہیں۔ایک اور تصویر جو ذرائع ابلاغ کو فراہم کی گئی ہے اس میں دو طیاروں کو ائربیس پر اترتے دیکھا جا سکتا ہے۔ایران کے ساتھ کشیدگی کے بعد یہ پہلا موقع ہے کہ ایف 22 اسٹیلتھ طیارے قطر بھیجے گئے ہیں۔ امریکی فضائیہ کا یہ اقدام ایران کی جانب سے ڈرون گرانے کے ایک ہفتے بعد سامنے آیا ہے۔دفاعی ماہرین کے مطابق مذکورہ طیارے جنگ کے دوران زمین فضا میں مار کرنے والے میزائل سسٹم کو تباہ کرنے کی صلاحیت رکھتے ہیں۔ان طیاروں کا استعمال صرف مکمل جنگ کے دوران ہی جاتا ہے اور ایف 22 اسٹیلتھ طیارے ایران کے دفاعی نظام ایس 300 کو مکمل تباہ کرنے کی صلاحیت رکھتے ہیں۔خیال رہے کہ مئی 2019 میں بھی امریکہ نے دفاعی میزائل سسٹم پیٹریاٹ کے ہمراہ اپنا ایک جنگی بحری بیڑا مشرق وسطی بھیجا تھا جو کہ اسٹرائیک گروپ سے لیس تھا۔ امریکہ کے دن دو بی- 52 بمبار طیارے بھی قطرپہنچائے گئے تھے۔
