مریم اورنگزیب کی مقبوضہ جموں وکشمیر کی متنازعہ حیثیت ختم کرنے کے بھارتی اقدام کی پروزور مذمت

 اسلام آباد (ایچ ایم نیوز ) پاکستان مسلم لیگ(ن)کی ترجمان مریم اورنگزیب نے مقبوضہ جموں وکشمیر کی متنازعہ حیثیت ختم کرنے کے بھارتی اقدام کی پروزور مذمت کرتے ہوئے کہا ہے کہ بھارتی جنونی ٹولہ طاقت اور ظلم سے کشمیریوں کو ان کے جائز قانونی حق سے محروم نہیں کرسکتا ،مقبوضہ کشمیر مسلمہ عالمی تنازعہ ہے، مودی حکومت اسے داخلی مسئلہ کے طورپر حل کرنے کا کوئی اختیار نہیں رکھتی، فلسطین کے بعد کشمیر کے معاملے میں بھارت نے صہیونی رویہ اپنایا ہے جس سے اقوام متحدہ کی ساکھ اور مقام سوالیہ نشان بن گیا ہے ۔ انہوں نے کہا مودی حکومت نے عالمی اور علاقائی امن کو تباہ کرنے کا بل پیش کیاہے جس کانتیجہ خونریزی کی صورت میں نکل سکتا ہے، پاکستان کا بچہ بچہ کشمیریوں کے لئے کٹ مرنے کو تیار ہے سید علی گیلانی کی بیٹیاں، بیٹے، آسیہ اندرابی اور یسین ملک کی بہنیں اور بھائی ہر پاکستانی کی شکل میں آپ کے ساتھ ہیں،اللہ تعالی کی تائید ونصرت آپ کے ساتھ ہے، کشمیر کے لئے ہر پاکستانی اور فوج کا سپاہی سربکف اور تیار ہے۔