راکھی ساونت نے برطانوی بزنس مین سے شادی کا اعتراف کرلیا

ممبئی (ایچ ایم نیوز) بالی ووڈ انڈسٹری کی متنازع اداکارہ اور رقاصہ راکھی ساونت نے انکشاف کیا ہے کہ انہوں نے بھارتی نژاد برطانوی بزنس مین سے شادی کر لی ہے۔ بھارتی میڈیا رپورٹس کے مطابق اداکارہ راکھی ساونت نے اپنی شادی کے بارے میں انکشاف کرتے ہوئے کہا کہ گزشتہ مہینے وائرل ہونے والی تصاویر پر میں ڈر گئی تھی تاہم اب اس خبر کی تصدیق کرتی ہوں کہ میں نے گزشتہ دنوں ایک نجی تقریب میں شادی کرلی ہے، میری رتیش سے شادی سے 15 دن قبل پہلی ملاقات ہوئی تھی۔ راکھی ساونت نے اپنے شوہر سے متعلق بتایا کہ خدا نے مجھے بہت اچھا شوہر دیا ہے، رتیش بھارتی نژاد برطانوی کاروباری شخصیت ہیں، شادی کے بعد وہ واپس برطانیہ جا چکے ہیں اور میں اپنے ویزے کا انتظار کر رہی ہوں تاکہ جلد اپنے شوہر کے پاس جا سکوں۔ انہوں نے مزید کہا کہ رتیش نے مجھے پہلی بار پربھو چاولہ کو دیئے گئے ایک انٹرویو کے دوران دیکھا تھا اور پھر انہوں نے مجھے واٹس ایپ پر میسجز کیے جس کے بعد ہم بہت جلد ہی اچھے دوست بن گئے، مجھے بھی رتیش بے حد پسند آئے تھے اور ان سے ملنے کے بعد میں ا ن سے شادی کی دعائیں کرنے لگی تھی، اب میری یہ خواہش پوری ہو گئی ہے۔ واضح رہے کہ گزشتہ ماہ راکھی ساونت کی کچھ تصاویر اور ویڈیوز منظر عام پر آئی تھیں جن میں انہوں نے ماتھے پر سیندور لگایا ہوا تھا اور دلہنوں والا سولہ سنگھار کر رکھا تھا۔ شادی کی خبروں کی تردید کرتے ہوئے ان تصاویر سے متعلق راکھی ساونت کا کہنا تھا کہ ان کی شادی نہیں ہوئی ہے بلکہ وہ تصاویر بس ایک برائیڈل فوٹو شوٹ کی ہیں مگر اب انہوں نے اپنی شادی کا اعتراف کر لیا ہے۔