دو خاندانوں کی چار دہائیوں کی نااہلی کی سزا عوام کو بھگتنی پڑتی ہے،وزیراعلیٰ پنجاب

لاہور(ایچ ایم نیوز)وزیراعلیٰ پنجاب عثمان بزدار نے کہا ہے کہ چار دہائیوں تک پنجاب اور سندھ پر دو خاندان حکمران رہے،کراچی، لاہور جیسے شہروں کی آبادی دن بدن بڑھتی گئی لیکن سیوریج سسٹم اور ماسٹر پلان اب بھی دہائیوں پراناہے،دو خاندانوں کی چار دہائیوں کی نااہلی  کی سزا عوام کو بھگتنی پڑتی ہے۔ہفتہ کو سماجی رابطوں کی ویب سائٹ ٹویٹر پر اپنے ٹویٹ میں وزیراعلیٰ پنجاب کا کہنا تھا کہ ہم نے لاہور کے "Master Plan 2040" پر کام شروع کیاہے تاکہ ووٹوں اور نوٹوں کیلئے نہیں شہریوں کی سہولت  کیلئے ڈویلپمنٹ کی جائے۔انہوں نے کہا کہ اس وقت صورتحال یہ ہے کہ 4-4 کنال کے گھروں کی جگہ کئی منزلہ پلازے بن چکے ہیں، زرعی زمینوں پر سوسائٹیاں بن گئی ہیں لیکن شہروں کا بنیادی سٹرکچر اب بھی 60 کی دہائی والا ہے، دو خاندانوں کی چار دہائیوں کی نااہلی  کی سزا عوام کو بھگتنی پڑتی ہے۔