سارے الزام جھوٹے ثابت ہوئے‘ سرخرو ہوگیا ہوں‘ محسن عباس حیدر

لاہور (ایچ ایم نیوز) اپنی اہلیہ پر تشدد کرنے کے الزام کے شکار اداکار و گلوکار محسن عباس حیدر نے کہا ہے کہ میں سرخرو ہوا ہوں سارے الزام جھوٹے ثابت ہوگئے ہیں۔ محسن عباس حیدر نے سماجی رابطے کی ویب سائٹ انسٹاگرام پر اپنے وکیل کے ساتھ ایک ویڈیو شیئر کی ہے جس میں انہوں نے بتایا کہ مجھ پر لگائے گئے سارے الزام بے بنیاد اور جھوٹے ہیں۔ محسن عباس حیدر کا کہنا ہے کہ میری اہلیہ کی جانب سے عدالت میں میرے خلاف کوئی ثبوت پیش نہیں کیا گیا، نہ کوئی گواہ پیش کیا گیا اور نہ ہی اسپتال کا ریکارڈ پیش کیا گیا۔ انہوں نے کہا ثابت ہوا کہ ہم سرخرو ہوئے اور سارے الزام جھوٹے تھے، لیکن ایک افسوس رہے گا کہ میرے ساتھیوں نے، میڈیا نے اور مداحوں نے خبر کی تصدیق کیے بغیر مجھے غلط سمجھا اور ایک روتی ہوئی عورت کو سچا سمجھا۔ انہو ں نے مزید کہا کہ ہر روتی ہوئی عورت سچی نہیں ہوتی، فیصلہ کرنے والی ذات اللہ کی ہے اور جیت ہمیشہ سچ کی ہوتی ہے۔