کورونا کی دوسری لہر خطرناک ہے، سلیم الدین قریشی

حکومتی احتیاطی تدابیر اختیار کرتے ہوئے مقررہ اوقات میں کاروبار کریں

 حیدرآباد (کامرس ڈیسک) حیدرآباد چیمبر آف اسمال ٹریڈرز اینڈ اسمال انڈسٹری کے صدر سلیم الدین قریشی نے تاجر و صنعتکار برادری سے درخواست کی ہے کہ وہ حکومت کی جانب سے کورونا وائرس (کووڈ 19-) سے متعلق جاری کردہ احتیاطی تدابیر اختیار کرتے ہوئے اپنا کاروبار جاری رکھیں۔ دورانِ کاروبار ماسک اور سینیٹائز کا استعمال کریں، خود بھی اِس کی پابندی کریں، اپنے ماتحت عملے کو بھی اِس کا پابند بنائیں اور صارفین کو بھی بغیر ماسک پہنے اپنے کاروبار کی جگہ نہ آنے دیں، مصافحہ کرنے سے گریز کریں۔ اُنہوں نے کہا کہ حکومت کی جانب سے کاروباری اوقات کی سختی سے پابندی کریں۔ اُنہوں نے کمشنر حیدرآباد ڈویژن محمد عباس بلوچ، ڈپٹی کمشنر حیدرآباد فواد غفار سومرو اور ڈسٹرکٹ ہیلتھ آفیسر ڈاکٹر لالا جعفر سے مطالبہ کیا کہ وہ کووڈ 19- اور احتیاطی تدابیر سے عوام کو آگاہی کا انتظام کریں اور اسپتالوں میں مطلوبہ بیڈز اور ونٹیلیٹرز کا انتظام کریں تاکہ ایمرجنسی کی صورتحال میں کمی نہ پائی جائے۔ اُنہوں نے مزید کہا کہ اسپتالوں اور ڈسپینسریوں میں بھی احتیاطی تدابیر لاگو کی جائیں اور وہاں بغیر ماسک کے اجازت نہ دی جائے اور سینیٹائز کا استعمال لازمی قرار دیا جائے تاکہ مریض، ڈاکٹر اور پیرا میڈیکل اسٹاف اِس بیماری سے محفوظ رہ سکیں۔