حالات و واقعات کا تقاضا ہے قومی سطح پر اتفاق رائے اور یکجہتی کا بے مثال مظاہرہ کیا جائے‘ وزیر زراعت چوہدری مسعود خالد

مظفرآباد (ایچ ایم نیوز ) وزیر زراعت و اسما چوہدری مسعود خالد نے کہا ہے کہ موجودہ ملکی صورتحال خصوصاً 5اگست کے بعد پیدا ہونے والے حالات و واقعات کا تقاضا ہے کہ قومی سطح پر اتفاق رائے اور یکجہتی کا بے مثال مظاہرہ کیا جائے۔ قومی قیادت کو موجودہ صورتحال میں اپنی ذمہ داریاں ادا کرنا ہوں گی ۔ پاکستان تاریخ کے نازک ترین موڑ پر ہے ۔ مقبوضہ کشمیر میں انسانی المیہ جنم لے چکا ہے ۔ 38دن سے جبر کی کیفیت ہے ۔ قابض بھارتی افواج کو قتل عام کی کھلی چھٹی ہے ۔ اقوام عالم نے اگر موجودہ نازک مرحلہ پر اپنی ذمہ داریوں کا احساس نہ کیا تو پھر یہ وقت کبھی ہاتھ نہیں آئے گا۔ خطہ کے اندر ایٹمی جنگ کا خطرہ موجود ہے ۔ عالمی برادری اپنی ذمہ داریوں کا احساس کرکے دنیا کو تباہی سے بچا سکتی ہے ۔ امن کے قیام اور تباہی سے بچنے کا واحد راستہ مسئلہ کشمیر کا حل ہے جو اقوام متحدہ کی قراردادوں میں تسلیم شدہ ہے ۔ بھارت کے اندر نسل پرست مذہبی ، جنونی حکومت کی سوچ امن کی راہ میں سب سے بڑی رکاوٹ ہے ۔ اپنے آفس چیمبر میں سینئر صحافیوں کے ساتھ بات چیت کے دوران وزیر زراعت مسعود خالد نے مزید کہا کہ 5اگست کے بعد عالمی سطح پر مسئلہ کشمیر کو جو توجہ حاصل ہوئی ہے وہ انتہائی اہم ہے اس سلسلہ میں کشمیری تارکین وطن اور بیرون ملک مقیم پاکستانیوں نے ملی اور فکری بیداری کا ثبوت دیا ہے ۔ خصوصاً برطانیہ میں مقیم کشمیری تارکین وطن کے زیر اہتمام بھارتی ہائی کمیشن اور قونصلیٹ کے سامنے ہونے والے احتجاجی مظاہرے عالمی میڈیا کی زینت بنے ہیں۔ برطانیہ میں مقیم کشمیری تارکین وطن نے حقیقی حریت پسند ہونے کا ثبوت دیتے ہوئے اپنے بھائیوں کے دکھ درد اور کٹھن گھڑی کا احساس کرتے ہوئے عالمی برادری کا ضمیر جھنجوڑنے کی کوشش کی ہے جس کا نتیجہ یہ ہے کہ اب پوری دنیا میں کام کرنے والی انسانی حقوق کی تنظیمیں اور دیگر آزاد خیال جمہوری ممالک مقبوضہ کشمیر کی صورتحال متفکر ہوئے ہیں ۔ اقوام متحدہ کی انسانی حقوق کمیشن میں انسانی حقوق کے حوالے سے 58ممالک نے جو رپورٹ اقوام عالم کے سامنے رکھی ہے وہ حقائق جاننے کے لئے کافی ہے ۔ انہوں نے کہا کہ اس وقت ضرورت اس امر کی ہے کہ آزاد کشمیر کے اندر نظریاتی اور فکری ہم آہنگی پیدا کرکے یکجہتی و اتحاد کا عملی مظاہرہ کیا جائے ۔ دشمن مکار اور عیار ہے جو ہمیں تقسیم کرکے منفی پروپیگنڈہ کے ذریعہ اپنے مقاصد حاصل کرنا چاہتا ہے مگر ہماری قوم باشعور ہے اور ملکی سلامتی و دفاع کے لئے اپنی ذمہ داریوں سے آگاہ ہے ۔ ایک سوال پر انہوں نے کہا کہ دفاع وطن کے لئے اندرون و بیرون ملک مقیم کشمیری اپنا سب کچھ قربان کرنے کے لئے تیار ہیں ۔ افواج پاکستان پر مکمل اعتماد ہے ۔